ខេត្តព្រះសីហនុ ៖ កម្លាំងកងរាជអាវុធហត្ថខេត្តព្រះសីហនុ ដឹកនាំដោយលោកឧត្តមសេនីយ៍ត្រី ហេង ប៊ុនទី មេបញ្ជាការអាវុធហត្ថខេត្ត ក្រោមការបញ្ជាផ្ទាល់ពីនាយឧត្តមសេនីយ៍ សៅ សុខា អគ្គមេបញ្ជាការរង និងជាមេបញ្ជាការកងរាជអាវុធហត្ថលើផ្ទៃប្រទេស និងឯកឧត្តម គួច ចំរើន អភិបាលខេត្តព្រះសីហនុ ក្រោមការសម្របសម្រួលពីលោក លឹម ប៊ុនហេង ព្រះរាជអាជ្ញារងអមសាលាដំបូងខេត្តព្រះសីហនុ បានចុះបង្ក្រាបកាលពីល្ងាចថ្ងៃទី១៤ ខែមករា ឆ្នាំ២០២០ នៅចំណុចផ្ទះជួលក្រោយវិទ្យាស្ថាន បណ្តុះបណ្តាលវិជ្ចាជីវៈ (អណ្តូងអ៊ុនតាក់) ក្រុម១៥ ស្ថិតនៅក្នុងភូមិ២ សង្កាត់៣ ក្រុងព្រះសីហនុ ករណីជនជាតិចិនចំនួន៥នាក់ ដែលកំពុងធ្វើសកម្មភាពបង្ខាំងមនុស្សជំរិតជនជាតិចិនដូចគ្នា។
បើតាមមេបញ្ជាការអាវុធហត្ថខេត្ត បញ្ជាក់ថា ប្រតិបត្តិការចុះបង្ក្រាបខាងលើនេះ កម្លាំងអាវុធហត្ថ ក៏បានរំដោះជនរងគ្រោះម្នាក់ជាស្រី ឈ្មោះ CHEN GUIQONG កាន់លិខិតឆ្លងដែនលេខL11054567 និងឃាត់ខ្លួនបានជនសង្ស័យ៥នាក់ ជាជនជាតិចិនដូចគ្នា។
ជាងនេះទៅទៀតកម្លាំង ក៏ដកហូតបានលុយយន្ត១៥០យន្ដ,លុយខ្មែរ៦៩,០០០រៀល,ទូរស័ព្ទ២គ្រឿង, អត្តសញ្ញាណប័ណ្ណចិន៧សន្លឹក,កាបូបស្ពាយចំហៀង១,ស្រោមបិទមុខ៨,មាសបិទមុខ១,ម៉ាស៊ីនវេលុយ១គ្រឿង,លិខិតឆ្លងដែន៤ក្បាល,រថយន្តស្តារិចពាក់ផ្លាកលេខព្រះសីហនុ 2C-8756 មួយគ្រឿង។
បច្ចុប្បន្នជនសង្ស័យ និងជនរងគ្រោះ ជំនាញកពុងធ្វើការសាកសួរ ដើម្បីបញ្ជូនសំណុំរឿង ទៅកាន់សាលាដំបូងខេត្តព្រះសីហនុ បន្តតាមនីតិវិធី៕
