ខេត្តបន្ទាយមានជ័យ ៖ ពលករខ្មែរប្រុស ស្រី រួមនិងក្មេងតូចៗ សរុបចំនួន ៥២ នាក់ ត្រូវបានកម្លាំងយោធា ការពារព្រំដែនថៃលេខ ១២១ សហការជាមួយតម្រួតនៅក្នុងតំបន់ ព្រមទាំងកម្លាំងអន្តោប្រវេសន៍ខេត្តស្រះកែវ ធ្វើការឃាត់ខ្លួនដើម្បីសាកសួរ បន្ទាប់ពីទទួលបានសេចក្តីរាយការណ៍ថា ពលករខ្មែរទាំងអស់នេះ បានលបឆ្លងដែនតាមច្រករបៀងចូលទៅក្នុងទឹកដីថៃដោយគ្មានច្បាប់អនុញ្ញាត ហើយបាននាំគ្នាបោះជុំរុំនៅក្នុងព្រៃក្បែខ្សែបន្ទាត់ព្រំដែនដើម្បីរស់នៅទីនោះទៀត ការឃាត់ខ្លួនពលករខ្មែរទាំងនេះបានធ្វើឡើងនាព្រលប់ថ្ងៃទី២៣ ខែធ្នូ ឆ្នាំ២០២០ ដោយមានការបញ្ជាផ្ទាល់ពីថ្នាក់ដឹកនាំតម្រួតខេត្ត គឺលោក អម្រឹត បុណ្យសុយ៉ា ក្នុងគោលបំណងគឺអនុវត្តតាមបទបញ្ជារបស់ប្រមុខរដ្ឋាភិបាល ក្នុងការការពរ និងទប់ស្កាត់ការរីករាលដាលនៃមេរោគ កូវីដ-១៩ ដែលកំពុងយាយីខ្លាំងនៅក្នុងប្រទេសថៃ ដោយកម្លាំងសហការទាំងនេះ បានចេញប្រតិបត្តិការទៅកាន់ចំណុចភូមិ១៤ ឃុំណងមួយ ស្រុកគោកខ្យូង ខេត្តស្រះកែវ ដើម្បីពិនិត្យមើល ។
ជាក់ស្តែង នៅពេលកម្លាំងចម្រុះចុះទៅដល់ព្រៃដែលជាតំបន់ឧធ្យានជាតិ ប៉ាស្ងួន បានប្រទះឃើញពលករខ្មែរជាច្រើននាក់ បានបោះជុំរុំ និងបានសាងសង់ផ្ទះតូចៗ ស្ទើរតែក្លាយជាកូនភូមិមួយទៅហើយ គឺសរុបមានចំនួន ៥២ នាក់ ក្នុងនោះស្រី ២៤ ប្រុស ២១ និងក្មេងតូចៗ ចំនួន ៧ នាក់ ហើយភ្លាមៗនោះដែរ ក្រុមមន្ត្រីសុខាភិបាលស្រុក បានចុះពិនិត្យ និងវាស់កម្តៅ តែគ្មាននរណាម្នាក់ មានកម្តៅខ្ពស់គួរអោយព្រួយបារម្ភឡើយ ។បន្ទាប់ពីបានសាកសួរ ពួកគេបានសារភាពថា គឺមកពីខេត្តសៀមរាបទាំងអស់គ្នា ដោយបានលបឆ្លងដែនចូលតាមច្រករបៀង ព្រមទាំងបានតែងតាំងមនុស្សម្នាក់ដែលជាពលករខ្មែរដូចគ្នាអោយធ្វើជាអ្នកគ្រប់គ្រង និងជាអ្នកចាត់ចែងបញ្ជូនពួកគេអោយចូលទៅធ្វើការ ការងារកសិកម្ម នៅក្នុងស្រុកគោកខ្យូង និងស្រុកក្បែខាង ដោយបានកម្រៃក្នុង ១ ថ្ងៃ គឺម្នាក់ ចាប់ពី ២០០ ទៅ ៣០០ បាត ដោយមិនចាំបាច់ត្រូវធ្វើដំណើរទៅកាន់ទីក្រុងបាងកកឡើយ ។បច្ចុប្បន្នពលករខ្មែរទាំងនេះ ត្រូវបានកម្លាំងសមត្ថកិច្ច និងអាជ្ញាធរនៅក្នុងតំបន់ ប្រគល់ទៅអោយ កម្លាំងការិយាល័យ អន្តោប្រវេសន៍ ខេត្តស្រះកែវដើម្បីអនុវត្តតាមនីតិវិធី ៕
