រាជធានីភ្នំពេញ ៖ ឯកឧត្តម ផុស សុវណ្ណ ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានព័ត៌មាននិងសោតទស្សន៍ ក្រសួងព័ត៌មាន បានចង្អុលពន្យល់នូវការកង្វល់របស់អ្នកសារព័ត៌មានក្នុងការចុះបញ្ជីពាណិជ្ជកម្ម ការធ្វើវិសោធនកម្មច្បាប់ស្ដីពីរបបសារព័ត៌មាន និងទិដ្ឋភាពរបស់អ្នកសារព័ត៌មាននាពេលបច្ចុប្បន្ន។
លោក សុខ សុវណ្ណ ប្រធានក្រុមប្រឹក្សាសារព័ត៌មានកម្ពុជា និងជាប្រធានសមាគមអ្នកសារព័ត៌មានខ្មែរប្រជាធិបតេយ្យ បានដឹកនាំប្រតិភូអ្នកកាសែតមកពីសមាគមនានានិងអ្នកសារព័ត៌មានចូលរួមក្នុងកម្មវិធីស្ដាប់បទបង្ហាញអំពីការផ្ដល់សេវានិងនីតិវិធីនៃការចុះបញ្ជីពាណិជ្ជកម្មលើវិស័យព័ត៌មាននិងសោតទស្សន៍ ក្រោមអធិបតីភាពឯកឧត្តម ផុស សុវណ្ណ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានព័ត៌មាននិងសោតទស្សន៏ នៅថ្ងៃច័ន្ទ ទី 28 ខែធ្នូ ឆ្នាំ2020 នៅទីស្ដីការក្រសួងព័ត៌មាន។
លោក សុខ សុវណ្ណ និងអ្នកសារព័ត៌មានបានលើកឡើងនូវការកង្វល់របស់អ្នកសារព័តមានដែលជាម្ចាស់អង្គភាពគេហទំព័រនៅក្នុងការចុះបញ្ជីពាណិជ្ជកម្មដែលត្រូវបង់ពន្ធជូនរដ្ឋនឹងត្រូវបំពេញឯកសារជាច្រើនតាមអេឡិចត្រូនិចនៅក្រសួងពាណិជ្ជកម្មដែលអង្គភាពទាំងនោះពុំមានចំណូលសមស្របនៅឡើយជាពិសេសអង្គភាពព័ត៌មានច្រើនបានចេញផ្សាយព័ត៌មានតាមឧត្តមគតិមិនមានចំណូល។ មួយវិញទៀតច្បាប់ស្ដីពីរបបសារព័ត៌មានដែលច្បាប់នេះកើតចេញតាំងពីឆ្នាំ 1995 តម្រូវឲ្យធ្វើវិសោធនកម្មដើម្បីអោយទាន់សភាពការណ៍វិវត្តនៃវិស័យសារព័ត៌មានដែលកំពុងឈានទៅជាព័ត៌មានតាមអេឡិចត្រូនិចនោះ លោក សុខ សុវណ្ណ បានសំណូមពរសុំឲ្យក្រសួងអនុញ្ញាតឱ្យសមាគមអ្នកសាសារព័ត៌មានឬអ្នកសារព័តមានបានចូលរួមផ្ដល់យោបល់ដើម្បីជាធាតុចូលនៅក្នុងអង្កច្បាប់ខាងលើ។
ឆ្លើយតបតាមសំណូមពរខាងលើ ឯកឧត្តមផុស សុវណ្ណ បានមានប្រសាសន៍ពន្យល់ដល់អ្នកសារព័ត៌មានថា ការចុះបញ្ជីពាណិជ្ជកម្មលើវិស័យព័ត៌មានគឺជាការគាំពារយូរអង្វែងដល់អង្គភាពព័ត៌មាន ដែលតម្រូវឲ្យអង្គភាពព័ត៌មានចុះបញ្ជីពាណិជ្ជកម្មនៅក្រសួងពាណិជ្ជកម្ម ចំណែកសមាគមអ្នកសារព័ត៌មានត្រូវចុះបញ្ជីនៅក្រសួងមហាផ្ទៃទើបស្របច្បាប់។ចំណែកពង្រាងវិសោធនកម្មច្បាប់ស្ដីពីរបបសារព័ត៌មាន ឯកឧត្តម ផុស សុវណ្ណ បានឲ្យដឹងថា ក្រសួងនិងប្រមូលធាតុចូលពីគ្រប់មជ្ឈដ្ឋានដូចជាច្បាប់ស្ដីពិសិទ្ធទទួលព័ត៌មាននាពេលកន្លងមកដែរ។
ឯកឧត្តម ផុស សុវណ្ណ បានបន្តទៀតថា ដោយបញ្ហានេះជាបញ្ហាថ្មីសម្រាប់អង្គភាពសារព័តមានដែលត្រូវចុះបញ្ជីពាណិជ្ជកម្មនៅក្រសួងពាណិជ្ជកម្ម អគ្គនាយកដ្ឋានព័ត៌មាននិងសោតទស្សន៍នឹងរង់ចាំជួយណែនាំដល់អង្គភាពព័ត៌មានទាំងអស់ដែលជួបការលំបាកនៅក្នុងការចុះបញ្ជីពាណិជ្ជកម្ម៕
