ខេត្តកំពង់ធំ ៖ កាលពីវេលាម៉ោង១៨ : ០៩ នាទី ថ្ងៃទី ១៤ ខែមករា ឆ្នាំ២០២១ នៅត្រង់ចំណុចអាងទឹកជីវភាព ក្នុងភូមិជីវភាព ឃុំអណ្តូងពោធិ៍ ស្រុកតាំងគោក ខេត្តកំពង់ធំ បុរសចំណាស់ម្នាក់បានស្លាប់បាត់បង់ជីវិតភ្លាមៗ ខណៈពេលកំពុងជិះម៉ូតូដឹកដើមត្រាវជាច្រើន ហើយក៏ជ្រុលចង្កូតធ្លាក់ចូលក្នុងប្រឡាយទឹក ត្រូវម៉ូតូ និងដើមត្រាវ សង្កត់ពីលើលិចក្នុងទឹក បណ្ដាលឲ្យឈ្លក់ទឹកលង់ស្លាប់យ៉ាងអាណោចអាធ័ម។
សពជនរងគ្រោះឈ្មោះ ទឹម យ៉ាន់ ភេទប្រុស អាយុ ៦២ឆ្នាំជនជាតិខ្មែរ នៅភូមិបុស្សស្បែង ឃុំជ្រលង ស្រុកតាំងគោក ខេត្តកំពង់ធំ។
តាមការបំភ្លឺរបស់ប្រជាពលរដ្ឋ កាលពីថ្ងៃទី១៤ -១ -២០២១ វេលាម៉ោប្រហែល ១៨:០០នាទី មានក្មេងវបេះពុទ្រា្ធបានរត់មកប្រាប់ថាវាឃើញមនុស្សជិះម៉ូតូឌុបដើមត្រាវធ្លាក់ចូលប្រឡាយទឹកនៅខាងត្បូងជាប់មាត់អាងភូមិជីវភាព ភ្លាមនោះកំលាំងប្រជាការពារចំនួន៣នាក់ នឹទៅដល់កន្លែងកើតហេតុឃើញម៉ូតូនិងដើមត្រាវសង្កត់ពីលើមនុស្សលិចទៅក្នុងទឹកឃើញតែជើងមួយខាង ពួកខ្លួនឃើញដូច្នេះក៏នាំគ្នាទាញដើមត្រាវចេញនឹងម៉ូតូនិងលើកស្រង់មនុស្សមក បានដាច់ខ្យល់ស្លាប់បាត់ទៅហើយ រួចក៏ទូរស័ព្ទប្តឹងសមត្ថកិច្ច។
ទទួលព័ត៌មានភ្លាមសមត្តកិច្ចជំនាញស្រុក បានសហការជាមួយប៉ុស្តិ៍រដ្ឋបាលអណ្តូងពោធិ៍ និងអាជ្ញាធរ ភូមិ ឃុំ ព្រមទាំងគ្រួសារសព បានចុះដល់កន្លែងកើតហេតុ ដើម្បីពិនិត្យសព តាមការពិនិត្យសពពុំមានស្លាកស្នាមអ្វីគួរអោយកត់សម្គាល់ឡើយ។ ហើយបានធ្វើការសន្និដ្ឋានថា៖ ជនរងគ្រោះឈ្មោះ ទឹម យ៉ាន់ ស្លាប់ដោយសារលង់ទឹកមូលហេតុ: ជនរងគ្រោះស្លាប់បណ្តាលមកពីជិះម៉ូតូដឹកដើមត្រាវច្រើន ក៏ជ្រុលចង្កូតធ្លាក់ចូលប្រឡាយទឹក ត្រូវម៉ូតូនិងដើមត្រាវ សង្កត់ពីលើឈ្លក់ទឹកស្លាប់តែម្តង៕
