ខេត្តបន្ទាយមានជ័យ ៖ នាព្រឹកថ្ងៃទី២ កញ្ញា ឆ្នាំ២០២២ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ អមដំណើរដោយមន្ត្រីជំនាញពាក់ព័ន្ធ អាជ្ញាធរស្រុក-ឃុំ បានអញ្ជើញចុះពិនិត្យមើលស្ថានភាពទឹក នៅភូមិសាស្ត្រឃុំចំណោម និងឃុំសឿ ស្រុកមង្គលបូរី ខេត្តបន្ទាយមានជ័យ។
នាឱកាសនោះ ឯកឧត្តមអភិបាលខេត្ត បានបញ្ជាឱ្យមន្ដ្រីជំនាញធនធានទឹកខេត្ត នាំយកគ្រឿងចក្រមកភ្លាមៗ ដើម្បីកាយផ្តាច់បើកមុខទឹក បង្ហូរទៅក្រោមតាមប្រឡាយមេ ដែលបានស្តារដើម្បីពន្លឿនការរំដោះទឹក ជៀសវាងការជន់លិច ផ្លូវ ស្រែ និងភូមិឋានរបស់ប្រជាពលរដ្ឋរស់នៅក្បែដងស្ទឹងមង្គលបូរីនោះ ក្នុងភូមិសាស្ត្រឃុំចំណោម និងឃុំសឿ នៃស្រុកមង្គលបូរី។
ជាមួយគ្នានោះ ឯកឧត្តមអភិបាលខេត្ត បានក្រើនរំលឹកដល់មន្ត្រីពាក់ព័ន្ធ និងអាជ្ញាធរមូលដ្ឋាន ត្រូវផ្តល់កិច្ចសហការក្តាប់ព័ត៌មាន និងរាយការណ៍ឱ្យបានទាន់ពេលវេលា ចំពោះករណីស្ថានភាពទឹកមានការហក់ឡើងខ្លាំង ដែលជាការព្រួយបារម្ភណាមួយ។
សូមបញ្ជាក់ថា ស្ថានភាពជាក់ស្តែងគិតត្រឹមថ្ងៃនេះ ក្នុងភូមិសាស្ត្រខេត្តបន្ទាយមានជ័យ ពុំទាន់មានគ្រោះទឹកជំនន់កើតឡើងនោះទេ មានតែស្ថានភាពទឹកហូរស្រុងពីទីខ្ពស់មកកាន់តំបន់ទំនាបបឹង និងស្ទឹងដែលបានធ្វើឱ្យស្ថានភាពមានការកើនឡើង៕
ប្រភព៖ រដ្ឋបាលខេត្តបន្ទាយមានជ័យ
