នៅព្រឹកថ្ងៃអង្គារ ៣ រោច ខែមាឃ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១១ ខែកុម្ភៈ ឆ្នាំ២០២០ ក្រសួងផែនការបានរៀបចំវគ្គបណ្តុះបណ្តាលស្តីពី វិធីសាស្ត្រកែច្នៃទិន្នន័យ និងផលិតឯកសារពត៌មានស្ថានភាព និងឯកសារពិន្ទុវិស័យ ។
វគ្គបណ្តុះបណ្តាលនេះប្រព្រឹត្តទៅនៅខេត្តមណ្ឌលគិរី ក្រោមអធិបតីភាពឯកឧត្តម ហ៊ូ តាំងអេង រដ្ឋលេខាធិការក្រសួងផែនការ ទទួលបន្ទុកការងារផែនការថ្នាក់ក្រោមជាតិ ។
នៅក្នុងប្រព័ន្ធផែនការថ្នាក់ក្រោមជាតិក្នុងបរិបទនៃកំណែទម្រង់វិមជ្ឈការវិសហមជ្ឈការ សម្រាប់ឆ្នាំ 2020 គឺជាការបើកទំព័រចាប់ផ្ដើមទី១ ដើម្បីឆ្លើយតបទៅនឹងតម្រូវការជាបន្ទាន់ទៅនឹងកំណែទម្រង់តាមបែបប្រជាធិបតេយ្យនៅថ្នាក់ក្រោមជាតិ ។
ឆ្លៀតឱកាសនេះផងដែរ ឯកឧត្តមក៏សូមថ្លែងអំណរគុណក្រុមការងារកសាងផែនការទាំងអស់ដែលបានខិតខំបំពេញការងារនិងកាតព្វកិច្ចយ៉ាងស្រស្រាក់ស្រស្រាំនាឆ្នាំកន្លងមកនេះ ចំពោះបរិបទថ្មីនៅក្នុងឆ្នាំ 2020 នេះមន្ទីរផែនការរាជធានីខេត្តដែលទទួលបន្ទុកជាផែនគ្រឹះសម្រាប់អភិវឌ្ឍន៍ប្រព័ន្ធផែនការជាតិ យើងទាំងអស់គ្នាត្រូវតែពិចារណារកគន្លឹះដើម្បីពង្រឹងការងាររបស់យើង ពង្រឹងទំនាក់ទំនងរចនាសម្ព័ន្ធការងារ ឲ្យសមស្របទៅតាមគោលនយោបាយលទ្ធិប្រជាធិបតេយ្យរបស់ប្រទេសកម្ពុជា ។
មន្ទីរផែនការនីមួយៗត្រូវរៀបចំគិតគូឲ្យបានរួចជាស្រេច ក្នុងនាមជាអ្នកដែលមានតួនាទីក្នុងការសម្របសម្រួលដើម្បីភ្ជាប់ការងាររបស់ភាគីពាក់ព័ន្ធទាំងអស់ អោយក្លាយទៅជាកម្លាំងរួមឯកភាពមួយ នៅក្នុងការអភិវឌ្ឍន៍មូលដ្ឋានរបស់យើងក្រោមការសម្រេចចិត្តរបស់ក្រុមប្រឹក្សានិងការចាត់ចែងអភិវឌ្ឍរបស់គណៈអភិបាល ។
ក្នុងនាមយើងជាមន្ត្រីផែនការត្រូវដឹងពីវិទ្យាសាស្ត្រពិតផង និងត្រូវដឹងអំពីវិទ្យាសាស្ត្រសង្គមផងដែរ ជាឧទាហរណ៍នៅក្នុងបច្ចុប្បន្ននេះដែរព័ត៌មានមានភាពសម្បូរបែបណាស់ ក្នុងនោះមានទាំងព័ត៌មានត្រឹមត្រូវពិត ព័ត៌មានបំភ្លៃខុសពីការពិតនៅលាយឡំជាមួយគ្នាតាមគ្រប់រូបភាព ដូច្នេះតើក្នុងនាមយើងជាមន្ត្រីផែនការអាចបែងចែកពិចារណារកឲ្យឃើញនូវព័ត៌មានពិតដែរឬទេ? នេះជាការតេស្តសាកល្បងនូវសមត្ថភាពរបស់មន្ត្រីផែនការគ្រប់រូប ។ ហេតុនេះយើងត្រូវមានការពិចារណាប្រកបដោយឆន្ទៈបើចង់អោយសង្គមមានការរីកចម្រើនត្រូវមានឧត្តមគតិនិងមនសិការស្នេហាជាតិពិត ។ ឯកឧត្តមបានផ្ដាំផ្ញើរទៅមន្ត្រីជំនាញទាំងអស់នៅក្នុងវគ្គបណ្ដុះបណ្ដាលនេះសូមខិតខំរៀនសូត្រ ចាប់យកនូវចំណុចគន្លឹះដែលសំខាន់ៗបំពេញនូវចំណុចខ្វះខាតរបស់ខ្លួនឯង ពង្រឹងនូវសមត្ថភាពខ្លួនដើម្បីកសាងកិត្យានុភាពរបស់អង្គភាព ។ ចំពោះថ្នាក់ដឹកនាំប្រធានអង្គភាពនៃមន្ទីរផែនការ សូមប្រកាន់និន្នាការនៃការអនុវត្តការងារដោយឈរនៅលើសមូហភាព ការយកចិត្តទុកដាក់ស្វែងយល់ពីសតិអារម្មណ៍របស់មន្ត្រីក្រោមឱវាទ ប្រកាន់គោលការណ៍ឈើវៀចធ្វើខ្នងឈើត្រង់ធ្វើកាំ ។
មុននឹងបញ្ចប់សំណេះសំណាល ការផ្ដល់អនុសាសន៍ នឹងប្រកាសបើកវគ្គបណ្ដុះបណ្ដាល ដោយយោងទៅតាមតម្រូវការការងារនៅក្នុងបរិបទថ្មីនេះ ឯកឧត្តមរដ្ឋលេខាធិការ បានស្នើដល់ថ្នាក់ដឹកនាំនៃមន្ទីរផែនការទាំងអស់ត្រូវខិតខំបញ្ចប់ការបំពេញ profile ឱ្យបាននៅក្នុង សប្តាហ៍ទី១ នៃខែមីនា ឆ្នាំ២០២០ខាងមុខនេះដោយប្រើយុទ្ធវិធីនិងយុទ្ធសាស្ត្រក្នុងការអនុវត្តន៍ឲ្យអស់ពីលទ្ធភាពរៀងៗរាងខ្លួន ដោយរក្សានូវទំនាក់ទំនងល្អជាមួយមន្ទីរអង្គភាពពាក់ព័ន្ធគ្រប់ស្ថាប័ននៅក្នុងខេត្ត ជាពិសេសដើម្បីឱ្យការងារនេះសម្រេចគោលដៅបានមន្ទីរផែនការទាំងអស់ត្រូវដកស្រង់បទពិសោធន៍ការងាររវាងគ្នានឹងគ្នា អំពីវិធីសាស្ត្រនានាដែលមន្ទីរផែនការមុនៗបានធ្វើវាដោយជោគជ័យនិងមានប្រសិទ្ធិភាពរួចមកហើយ នោះទើបជាការបង្ហាញអំពីសាមគ្គីភាព ការរួបរួមគ្នាចេះចែករំលែករួមសុខរួមទុក្ខចេះជួយគ្នាទៅវិញទៅមកក្នុងគ្រាលំបាក នោះហើយគឺជាសន្តិភាពពិតនៃគ្រួសារផែនការទាំងអស់ ៕
