កាំប៉ាឡា៖ បើយោងតាមការចេញផ្សាយដោយទីភ្នាក់ងារសារព័ត៌មានស៊ីនហួរ នៅថ្ងៃអាទិត្យ ទី០១ ខែមករា ឆ្នាំ២០២៣ អាជ្ញាធរប៉ូលិសបានឲ្យដឹងថា មនុស្សយ៉ាងតិច៩នាក់បានស្លាប់ និងជាច្រើននាក់ទៀតរងរបួស នៅក្នុងហេតុការណ៍រត់ជាន់គ្នា ខណៈដែលហ្វូងមនុស្សដែលកំពុងប្រញាប់ប្រញាល់ទៅមើលការបាញ់កាំជ្រួចឆ្លងឆ្នាំថ្មី បានជាប់គាំងនៅក្នុងច្រករបៀងតូចចង្អៀតនៅក្នុងផ្សារទំនើបមួយ នៅជិតរដ្ឋធានីនៃប្រទេសអ៊ូហ្គង់ដា។
ប៉ូលីសបាននិយាយនៅថ្ងៃអាទិត្យនេះថា ឧបទ្ទវហេតុនេះបានកើតឡើងនៅពេលប្រជាជនបានចាប់ផ្តើមកកកុញតាមរយៈផ្លូវឆ្លងកាត់នៅក្នុងផ្សារទំនើប Freedom City ក្នុងទីក្រុងកាំប៉ាឡា នៅពេលដែលម៉ោងបាញ់កាំជ្រួចស្វាគមន៍ឆ្នាំថ្មី ជិតឈានមកដល់។
មនុស្សម្នាបានប្រារព្ធពិធីចូលឆ្នាំថ្មីនៅផ្សារទំនើបខាងលើ ដែលស្ថិតនៅលើផ្លូវហាយវ៉េតភ្ជាប់អាកាសយានដ្ឋានអន្តរជាតិ Entebbe និងទីក្រុងកាំប៉ាឡា។
អ្នកនាំពាក្យប៉ូលិសលោក Luke Owoyesigyire បាននិយាយថា «បុគ្គលិកសង្គ្រោះបន្ទាន់បានប្រញាប់ប្រញាល់ទៅកន្លែងកើតហេតុ ហើយបានយកអ្នករបួសទៅកាន់មន្ទីរពេទ្យ ជាកន្លែងដែលមនុស្ស ៩នាក់ត្រូវបានបញ្ជាក់ថាបានស្លាប់»៕
