ខេត្តកំពត ៖ នៅរសៀលថ្ងៃទី០៤ ខែកុម្ភៈ ឆ្នាំ២០២៣ ក្រុមការងារសៀវភៅ ”កូនប្រុសច្បងដ៏មានឥទ្ធិពល” ដែលមានឯកឧត្តម ពៅ សុខ ទីប្រឹក្សាផ្ទាល់សម្តេចតេជោ និងលោក មែ ស៊ីថុន ប្រធានសមាគមអតីតសិស្ស-និស្សិតនៅកម្ពុជា ព្រមទាំងក្រុមការងារ បានបន្តផ្តល់សៀវភៅ ៖
-អ្នកយុទ្ធសាស្ត្រវ័យក្មេងនៅអាស៊ី
-សម្តេច ហ៊ុន សែន ៣ យន្តការឈ្នះកូវីដ-១៩
-ទឹកចិត្តអ្នកជួយសង្គ្រោះ
-កូនប្រុសច្បងដ៏មានឥទ្ធិពល
សរុបចំនួន ៣៣០ ច្បាប់ ជូនរដ្ឋបាលខេត្តកំពត, មន្ទីរអប់រំ យុវជន និងកីឡា, រដ្ឋបាលក្រុងស្រុក, និងបណ្ណាល័យ នៃវិទ្យាល័យទូទាំងខេត្ត ។
ឯកឧត្តម ខៀវ រិទ្ធិភ័ណ្ឌ អភិបាលរងខេត្តកំពត តំណាង ឯកឧត្តម ម៉ៅ ធនិន អភិបាល នៃគណៈអភិបាលខេត្តកំពត បានសម្តែងនូវសេចក្តីរីករាយ និងថ្លែងអំណរគុណយ៉ាងខ្លាំងចំពោះ ឯកឧត្តម ពៅ សុខ ទីប្រឹក្សាផ្ទាល់សម្តេចតេជោ និងលោក មែ ស៊ីថុន ប្រធានសមាគមអតីតសិស្ស-និស្សិតនៅកម្ពុជា ព្រមទាំងក្រុមការងារទាំងអស់ដែលបានផ្តល់សៀវភៅបែបប្រវត្តិសាស្ត្រដ៏មានតម្លៃ ។ ហើយការចងក្រងជាសៀវភៅនេះ ពិតជាមានគុណប្រយោជន៍សម្រាប់ប្រជាពលរដ្ឋទូទៅបានសិក្សាឈ្វេងយល់ ឲ្យកាន់តែស៊ីជម្រៅអំពីការលះបង់ ស្នាដៃ និងសមិទ្ធផលធំៗរបស់សម្តេចតេជោ សម្តេចកិត្តិព្រឹទ្ធបណ្ឌិត និងឯកឧត្តម ហ៊ុន ម៉ាណែត សម្រាប់ប្រទេសជាតិ និងប្រជាជន ។ ហើយការផ្តល់សៀវភៅដ៏មានតម្លៃប្រកបដោយខ្លឹមសារ និងអត្ថន័យនៅពេលនេះ គឺពិតជាចំពេល និងល្អខ្លាំងណាស់ ។
ជាមួយគ្នានេះដែរ ឯកឧត្តម ពៅ សុខ ទីប្រឹក្សាផ្ទាល់សម្តេចតេជោ បានឲ្យដឹងថា ការរៀបចំចងក្រងជាសៀវភៅខាងលើនេះ គឺដើម្បីតម្កល់ទុកជាឯកសារ សម្រាប់ប្រជាពលរដ្ឋទូទៅ និងយុវជនជំនាន់ក្រោយបានសិក្សាឈ្វេងយល់អំពីប្រវត្តិសាស្ត្រ និងសមិទ្ធផលពិតរបស់ថ្នាក់ដឹកនាំ ។ ឯកឧត្តម បានបន្តថា សៀវភៅ “កូនប្រុសច្បងដ៏មានឥទ្ធិពល” បង្ហាញពីវីរភាព គុណបំណាច់ដែលបានលះបង់ចំពោះជាតិ សាសនា ព្រះមហាក្សត្រ ជាពិសេសក្នុងយុទ្ធនាការប្រយុទ្ធប្រឆាំងកូវីដ-១៩ នាពេលកន្លងមក របស់ ឯកឧត្តម ហ៊ុន ម៉ាណែត ។
