ភ្នំពេញ ៖ សមាគម ក្លឹប និងសហព័ន្ធសារព័ត៌មាននៅកម្ពុជាចំនួន១៣ បានរួមគ្នាចងក្រងជា សម្ព័ន្ធភាពមួយឈ្មោះថា «សម្ព័ន្ធសមាគមសារព័ត៌មានកម្ពុជា»។ តើ «សម្ព័ន្ធសមាគមសារព័ត៌មានកម្ពុជា» នឹងគ្រោងបំពេញបេសកកម្មសំខាន់ៗអ្វីខ្លះ?
ឯកឧត្តម ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា នៅរសៀលថ្ងៃទី១៣ ខែកុម្ភៈ ឆ្នាំ២០២៣នេះ បានបើកកិច្ចប្រជុំរួមមួយ ជាមួយតំណាងនិងប្រធានសមាគមសារព័ត៌មានធំៗចំនួន១៣សមាគម ដែលកិច្ចប្រជុំនេះ ក៏មានការចូលរួមពីតំណាង អង្គភាព ស្ថាប័ន ប្រមាណជាង៨០នាក់ ហើយកិច្ចប្រជុំធ្វើឡើងនៅអាគារសេរីភាពនៃសហភាពសហព័ន្ធអ្នកសារព័ត៌មានកម្ពុជា ក្នុងគោលបំណងពិភាក្សាលើយន្តការចងក្រងជាសម្ព័ន្ធភាពរួមគ្នាហៅថា «សម្ព័ន្ធសមាគមសារព័ត៌មានកម្ពុជា» ដើម្បីរួមគ្នាជាធ្លុងមួយ ក្នុងការពង្រឹងពង្រីកតួនាទីរបស់សារព័ត៌មាន និងការផ្សព្វផ្សាយនៅកម្ពុជា។
តំណាងសមាគមសារព័ត៌មានកម្ពុជាចំនួន១៣ ដែលបានចូលរួមនៅក្នុងកិច្ចប្រជុំរួមមាន៖
-សហភាពសហព័ន្ធអ្នកសារព័ត៌មានកម្ពុជា
-ក្លឹបអ្នកកាសែតឯករាជ្យ
-សមាគមសារព័ត៌មានអេឡិចត្រូនិច «អឹមអេសជេ»
-សមាគមអ្នកសារព័ត៌មានខ្មែរប្រជាធិបតេយ្យ
-សមាគមសេរីភាពអ្នកសារព័ត៌មានកម្ពុជា
-សមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា
-សមាគមអ្នកសារព័ត៌មាន កម្ពុជា-អាស៊ាន
-សមាគមអ្នកសារព័ត៌មាន យុវជន
-សមាគមកាសែតខ្មែរសន្តិភាព
-សមាគមអ្នកសារព័ត៌មានឯករាជ្យជាតិកម្ពុជា
-សមាគមមិត្តភាពអ្នកសារព័ត៌មានអាស៊ាន
-សមាគមអ្នកសារព័ត៌មានអង្កេតការពិតនៅកម្ពុជា
– សមាគមសម្ព័ន្ធអ្នកសារព័ត៌មានសកលសន្តិភាព
ឯកឧត្តម ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា បានសង្កត់ធ្ងន់ថា បេសកកម្មចម្បងនៅក្នុងការបង្កើត«សម្ព័ន្ធសមាគមសារព័ត៌មានកម្ពុជា» ដែលរៀបចំឡើងនៅថ្ងៃនេះ មានបេសកកម្មសំខាន់ៗចំនួន៤ដូចជា៖
– «សម្ព័ន្ធសមាគមសារព័ត៌មានកម្ពុជា» នឹងធ្វើសេចក្តីថ្លែងការណ៍រួមគ្នានៅក្នុងឱកាសទិវាសេរីភាពសារព័ត៌មានអន្តរជាតិ ៣ឧសភា។
– «សម្ព័ន្ធសមាគមសារព័ត៌មានកម្ពុជា» នឹងធ្វើសេចក្តីថ្លែងការណ៍រួមគ្នាក្នុងករណីមានរបាយការណ៍ សេចក្តីថ្លែងការណ៍ និងការផ្សព្វផ្សាយទាំងឡាយណា ដែលប៉ះពាល់ដល់តម្លៃតួនាទីសារព័ត៌មានកម្ពុជា ឬធ្វើឱ្យប៉ះពាល់ដល់កិត្យានុភាព នៃព្រះរាជាណាចក្រកម្ពុជា។
– «សម្ព័ន្ធសមាគមសារព័ត៌មានកម្ពុជា» នឹងធ្វើសេចក្តីថ្លែងការណ៍រួមគ្នា និងរួមគ្នារកវិធីអន្តរាគមន៍ដើម្បីការពារសិទ្ធិនិងតួនាទីសារព័ត៌មានដែលទទួលរងភាពអយុត្តិធម៌ ឬការបំពានលើកិត្តិយស និងលើរូបរាងកាយអ្នកសារព័ត៌មាន។
– «សម្ព័ន្ធសមាគមសារព័ត៌មានកម្ពុជា» នឹងសិក្សាលទ្ធភាពក្នុងការបើកវគ្គបណ្តុះបណ្តាលវិជ្ជាជីវៈសារព័ត៌មានយ៉ាងហោច៦ខែម្តង ដើម្បីរួមចំណែកពង្រឹងសីលធម៌វិជ្ជាជីវៈនិងសមត្ថភាពអ្នកសារព័ត៌មានគ្រប់ទម្រង់។
ការចុះអនុស្សារណៈយោគយល់គ្នារបស់សម័្ពន្ធសមាគមសារព័ត៌មានកម្ពុជា នឹងធ្វើឡើងជាផ្លូវការក្នុងពេលដ៏ឆាប់ខាងមុខនេះ។ ឯកឧត្តម ហ៊ុយ វណ្ណៈ បានគូសបញ្ជាក់ថា នេះគឺជាទំព័រប្រវត្តិសាស្ត្រថ្មីមួយក្នុងវិស័យសារព័ត៌មាននៅកម្ពុជា ដែលអង្គការ សមាគមសារព័ត៌មាន មានទស្សនៈស្របគ្នា និងបានឯកភាពគ្នា ចងសម្ព័ន្ធភាពឱ្យលេចរូបរាងឡើងជាផ្លូវការ ដើម្បីបំពេញការងារជាមួយគ្នា ឈរលើស្មារតីកិច្ចសហការ និងស្ម័គ្រចិត្ត ដើម្បីបម្រើផលប្រយោជន៍សហគមន៍សារព័ត៌មាន និងបម្រើផលប្រយោជន៍ជាតិមាតុភូមិ៕
