ខេត្តបាត់ដំបង ៖ លោកជំទាវ ពេជ ចន្ទមុន្នី ហ៊ុនម៉ាណែត អនុប្រធាន ក្រុមប្រឹក្សាភិបាល នៃសមាគមគ្រូពេទ្យស្ម័គ្រចិត្តយុវជន សម្តេចតេជោ នៅព្រឹកថ្ងៃទី២៣ ខែតុលា បានចុះសំណេះសំណាលសួរសុខទុក្ខ រួមទាំងចែកអំណោយដល់ប្រជាពលរដ្ឋ១១៦០គ្រួសារ ដែលក្នុងនោះមកពីឃុំកំពង់ព្រះ និងឃុំកំពង់ព្រៀង ស្រុកសង្កែ ៨៣០គ្រួសារ និងមកពីឃុំឫស្សីក្រាំង ស្រុកមោងឫស្សី នៃខេត្តបាត់ដំបង ៣៣០គ្រួសារ ។
ប្រជាពលរដ្ឋសម្តែងនូវការសប្បាយរីករាយ ហើយចាត់ទុកកាយវិការប្រកបដោយសប្បុរសធម៌នេះគឺជាការចូលរួមចែក រំលែកក្តីអាណិតស្រឡាញ់ និងរួមសុខរួមទុក្ខ ជាមួយប្រជាពលរដ្ឋដែលកំពុងតែត្រូវការជំនួយ សម្រាលការលំបាក ស្របពេលដែលពួកគាត់កំពុងតែលិចលង់ ។
លោកជំទាវ ពេជ ចន្ទមុន្នី ហ៊ុនម៉ាណែត បានពាំនាំនូវប្រសាសន៍របស់សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខប្រជាពលរដ្ឋរងគ្រោះទាំងអស់ និងចូលរួមសោកស្តាយនូវការខូចខាត បាត់បង់នូវទ្រព្យសម្បត្តិ ផលដំណាំ និងហេដ្ឋារចនាសម្ព័ន្ឋផ្សេងៗ។ តែទោះជាយ៉ាងណា សម្តេចទាំងទ្វេរ នៅតែបន្តជួយដល់ប្រជាពលរដ្ឋដែល រងគ្រោះគ្រប់ពេលវេលា ដោយមិនទុក្ខនណារម្នាក់ចោលឱ្យស្លាប់ដោយអត់អាហារនោះទេ។
លោកជំទាវ ក៏បានកោតសសើរចំពោះកងកម្លាំងគ្រប់ប្រភេទ រួមមាន កងទ័ព កងរាជអាវុធហត្ថ នគរបាល អជ្ញាធរមូលដ្ឋាន គ្រប់លំដាប់ថ្នាក់ រួមនឹងកម្លាំងយុវជនអ្នកស្ម័គ្រចិត្ត ដែលបានចូលរួមយ៉ាងសកម្មក្នុងការងារមនុស្សធម៌មួយនេះ និងសូមថ្លែង អំណគុណដល់បណ្តាសប្បុរសជន ទាំងក្នុងនិងក្រៅប្រទេស តែងតែជួយឧបត្ថមគាំទ្រដល់កងទ័ព និងសមាគម TYDA នូវ សម្ភារប្រើប្រាស់ ស្បៀងអាហារ សម្រាប់ជូនដល់ជនរងគ្រោះ៕
