ខេត្តសៀមរាប ៖ អ្នកតំណាងរាស្ត្រ និងអាជ្ញាធរខេត្តសៀមរាប បានអះអាងថា រាជរដ្ឋាភិបាលកម្ពុជា បានសម្រេចកាត់ឃុំកំពង់ភ្លុក នៃស្រុកប្រាសាទបាគង ចេញពីតំបន់៣ នៃដីបឹងទន្លេសាប ដើម្បីប្រគល់ជូនជាកម្មសិទ្ធិដល់ប្រជាពលរដ្ឋ ក្នុងឃុំមួយនេះ។
ការលើកឡើងបែបនេះបានធ្វើឡើងនៅក្នុងឱកាសដែលគ្រូពេទ្យវិជ្ជសាស្ត្រចិនបុរាណមកពីកោះតៃវ៉ាន ចុះចែកអំណោយ និងពិនិត្យព្យាបាលជំងឺជូនប្រជាពលរដ្ឋ ចំនួន ១,០២០គ្រួសារ នៅឃុំកំពង់ភ្លុក នាថ្ងៃទី១៤ ខែមីនា ឆ្នាំ២០២៣។
អភិបាលរងខេត្តសៀមរាប លោក ពិន ប្រាកដ បានថ្លែងថា ដើម្បីរួមចំណែកកាត់បន្ថយនូវការលំបាកនានា របស់បងប្អូនប្រជាពលរដ្ឋនៅឃុំកំពង់ភ្លុក ស្រុកប្រាសាទបាគងនេះ រាជរដ្ឋាភិបាលកម្ពុជា បានសម្រេចកាត់ឆ្វៀលឃុំ ដែលមានទីតាំងក្នុងដែនបឹងទន្លេសាបមួយនេះ ចេញពីតំបន់៣ ដែលជាតំបន់ត្រូវការពារ។ លោកថា បន្ទាប់ពីកាត់ឆ្វៀល រាជរដ្ឋាភិបាលនឹងធ្វើការវាស់វែងជូនជាកម្មសិទ្ធិដល់បងប្អូនប្រជាពលរដ្ឋ ។
អ្នកតំណាងរាស្ត្រមណ្ឌលសៀមរាប ឯកឧត្តមអ្នកឧកញ៉ា សៀង ណាំ បានចូលរួមសាទរជាមួយបងប្អូនប្រជាពលរដ្ឋក្នុងឃុំកំពង់ភ្លុក ដែលបានទទួលអំណោយដ៏ថ្លៃថ្លាពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានធ្វើការកាត់ឆ្វៀលឃុំកំពង់ភ្លុកទាំងមូល ចេញពីដីព្រៃលិចទឹកតំបន់៣ ជូនដល់បងប្អូនធ្វើកម្មសិទ្ធិកាន់កាប់ស្របច្បាប់ ដោយមិនភ័យខ្លាចដូចពីមុនឡើយ។ ឯកឧត្តមអ្នកឧកញ៉ាបន្តថា រាល់ដីកម្មសិទ្ធិ ក្រោយពីរដ្ឋបានចេញនូវប័ណ្ណសម្គាល់អចលន:ទ្រព្យ របស់បងប្អូនហើយនោះ សូមបងប្អូនត្រូវរក្សាជាមរតកក្នុងគ្រួសារ ហើយបងប្អូនមានសិទ្ធិយកទៅប្រើប្រាស់ទៅតាមតម្រូវការចាំបាច់របស់បងប្អូនផងដែរ ។
ជាមួយគ្នានេះដែរ ឯកឧត្តមអ្នកឧកញ៉ា សៀង ណាំ ក៏បានធ្វើការណែនាំមួយចំនួន ដល់បងប្អូនប្រជាពលរដ្ឋ ត្រូវចេះរួមសហការគ្នាឲ្យបានល្អ ជាមួយអាជ្ញាធរមូលដ្ឋាន ក្នុងកិច្ចការពារ អភិរក្សនូវសម្បត្តិធម្មជាតិ ដែលនៅជុំវិញបងប្អូន មិនត្រូវធ្វើការ កាប់រានព្រៃលិចទឹកយកដីធ្វើជាកម្មសិទ្ធិផ្ទាល់ខ្លួនបន្តទៀតឡើយ តែបើបងប្អូនក្នុងឃុំកំពង់ភ្លុក ឬក៏មកពីតំបន់ផ្សេងៗ មកបំពាននោះ នឹងត្រូវទទួលទោសទៅតាមផ្លូវច្បាប់។ ចំពោះអាជ្ញាធរស្រុក ឃុំ និងស្ថប័នពាក់ព័ន្ធទាំងអស់ ត្រួវរួមគ្នាធ្វើយុទ្ធនាការ ក្នុងការដាំដុះឡើងវិញ នូវកូនឈើព្រៃលិចទឹក នៅតាមតំបន់មានការរីចរឹល ដើមី្បជាជម្រកត្រីពងកូននៅរដូវទឹកឡើង តែបើគ្មានព្រៃលិចទឹកទេនោះ បងប្អូនប្រជានេសាទនៅឃុំកំពង់ភ្លុក និងបាត់បង់នូវអាជីព ចំណូលរបស់ខ្លួន នឹងធ្វើឲ្យជីវភាពរបស់បងប្អូនកាន់តែធ្លាក់ចុះថែមទៀត ។ ម៉្យាងទៀតដោយឃុំកំពង់ភ្លុកនេះ ជាតំបន់ទេសចរណ៍ធម្មជាតិ ដែលបានទាក់ទាញភ្ញៀវទេសចរជាតិ អន្តរជាតិ ចូលមកទស្សនាកម្សាន្ត ក្នុងការបង្កើននូវមុខរបរដល់បងប្អូននៅទីនេះ តាមរយ:វិស័យទេសចរណ៍ ក្នុងការលើកស្ទួយជីវភាពរបស់បងប្អូន និងកាត់បន្ថយនូវរាល់បទល្មើសនេសាទទៀតផង ។ ឯកឧត្តមអ្នកឧកញ៉ាបណ្ឌិត សៀង ណាំ ក៏បានធ្វើការក្រើនរំលឹកដល់បងប្អូនប្រជាពលរដ្ឋ ដែលមានអត្តសញ្ញាណប័ណ្ណ ជិតផុតសុពលភាព ត្រូវប្រញ៉ាប់ទៅធ្វើនៅប៉ុស្តិ៍នគរបាលរដ្ឋបាលឃុំរបស់ខ្លួន ដើមី្បត្រៀមលក្ខណ:ចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ។ឃុំកំពង់ភ្លុក ជាឃុំមួយរបស់ស្រុកប្រាសាទបាគង មានទីតាំងស្ថិតនៅក្នុងដែនបឹងទន្លេសាប។
អភិបាលស្រុកប្រាសាទបាគង លោក សូ ប្លាតុង បានឲ្យដឹងថា ឃុំកំពង់ភ្លុ មានភូមិចំនួន៣ មានចំនួន ៩៩៨គ្រួសារ និង ប្រជាពលរដ្ឋ សរុប ៣,៨២៥នាក់ ស្រី ១,៩៣៨នាក់ ដោយប្រកបរបរជាអ្នកនេសាទ ៦៥% និងដឹកភ្ញៀវទេសចរ ៣០% និង ៥%ទៀតប្រកបរបរលក់ដូរ ៕ ដកស្រង់ពីអាកាប៉េ
