ខេត្តកោះកុង ៖ នៅថ្ងៃទី១៨ ខែកក្កដា ឆ្នាំ២០២៣ អគារមណ្ឌលសុខភាពយន្តមីនឃុំជ្រោយស្វាយដ៍ថ្មី រួមនិងសម្ភារៈបរិក្ខាពេទ្យថ្មីស្រឡាង ត្រូវបានសម្ភោធដាក់ឲ្យប្រើប្រាស់ជាផ្លូវការ សម្រាប់បម្រើសេវាសុខភាពជូនប្រជាពលរដ្ឋ ក្រោមអធិបតីភាព ឯកឧត្តម យន្ត មីន រដ្ឋលេខាធិការក្រសួងការពារជាតិ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកោះកុង។
អគារមណ្ឌលសុខភាពយន្តមីនជ្រោយស្វាយ ស្ថិតនៅភូមិភ្នំស្រឡៅ ឃុំជ្រោយស្វាយ ស្រុកស្រែអំបិល ខេត្តកោះកុង ១ខ្នង២ជាន់ មានទំហំ១២.៥មx២១.៣ម មានបន្ទប់ចំនួន១៨បន្ទប់ បន្ទប់ទឹកចំនួន៨ រោងរថយន្ត២០មx៣.៥ម ចំនួនមួយ រោងបាយ១ ស្រះទឹកចំនួន១ រួមបរិក្ខាពេទ្យមួយចំនួន ប្រើប្រាស់ថវិកាសាងសង់ជាង២០ម៉ឺនដុល្លាអាមេរិក។
ឯកឧត្តម យន្ត មីន បានថ្លែងថា អរគុណសន្តិភាព នយោបាយឈ្នះ.ឈ្នះ មានសន្តិភាព មានការអភិវឌ្ឍន៍គ្រប់ផ្នែកគ្រប់វិស័យទាំងនេះស្ថិតក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលសម្តេចខិតខំអភិវឌ្ឍន៍តាំងពីបាតដៃទទេរហូតមានអ្វីគ្រប់បែបយ៉ាង ហើយនិងធ្វើឲ្យមានភាពល្បីល្បាញនៅលើឆាកអន្តរជាតិទៀតផង។
ឯកឧត្តម យន្ត មីន បានថ្លែងថា ៖ ក្នុងគោលបំណងដើម្បីបំរើសុខភាពប្រជាពលរដ្ឋ ឯកឧត្តមបានផ្ដួចផ្ដើមសាងសង់មណ្ឌលសុខភាពនេះឡើង ក្នុងគោលបំណងផ្ដល់សេវាសុខាភិបាលឲ្យបានកាន់តែជិតប្រជាពលរដ្ឋ តបទៅនឹងគោលនយោបាយរាជរដ្ឋាភិបាលកម្ពុជាលើកកម្ពស់វិស័យសុខាភិបាល ដែលជាសេចក្ដីត្រូវការរបស់ពលរដ្ឋមិនអាចខ្វះបានឡើយ។
ឯកឧត្តម ក៏បានជំរុញឲ្យអាជ្ញាធរមូលដ្ឋាន មន្ត្រីជំនាញនិងប្រជាពលរដ្ឋចូលរួមថែរក្សានូវសមិទ្ធផលដែលកើតមាននូវថ្ងៃនេះឲ្យបានគង់វង្សទៅថ្ងៃអនាគត រីឯក្រុមគ្រូពេទ្យ គប្បីគោរពនៅក្រមសីលធម៌វិជ្ជាជីវៈដែលខ្លួនធ្លាប់បានសឹក្សាររៀនសូត្រកន្លងមកឲ្យបានខ្ជាប់ខ្ជួន និងមានប្រសិទ្ធភាព ជៀសវាងមានការថ្នាំងថ្នាក់ពីប្រជាពលរដ្ឋអ្នកមកទទួលសេវាសុខាភិបាល។
ឯកឧត្តម យន្ត មីន បានបន្តថា ៖ អាគារមណ្ឌលសុខភាព យន្ត មីន ជ្រោយស្វាយ គឺកើតចេញមកពីបេះដូងកូនខ្មែរយើងទាំងអស់គ្នាជាសប្បុរសជន បានជួយគ្នាដើម្បីកសាងឡើងក្នុងទឹកដីឃុំជ្រោយស្វាយនេះ ដោយចាប់ផ្តើមសាងសង់នៅថ្ងៃទី១២ ខែមិនា ឆ្នាំ២០២៣ បានសាងសង់រួចរាល់ដាក់សម្ភោធឲ្យប្រើប្រាស់ជាផ្លូវការនៅថ្ងៃទី១៨ ខែកក្កដា ឆ្នាំ២០២៣ ក្នុងការបំរើសេវ៉ាសុខភាពជូនប្រជាពលរដ្ឋដោយមិនគិតនិន្នាការនយោបាយពូជសាសន៍ឡើយ ។ មណ្ឌលសុខភាពនេះជាតម្រូវការចាំបាច់របស់ប្រជាពលរដ្ឋក្នុងឃុំជ្រោយស្វាយ ស្រុកស្រែអំបិល ដែលពួកគាត់នៅឆ្ងាយពីមន្ទីរពេទ្យបង្អែកស្រុកស្រែអំបិល ហើយពួកគាត់អាចកាត់បន្ថយហានិភ័យបានច្រើននៅពេលជួបបញ្ហាសុខភាពឬបញ្ហាអ្វី១។
នាយឧត្តមសេនីយ៍ បានបន្តទៀតថា ក្នុងឃុំជ្រោយស្វាយអីឡូវនេះមានការអភិវឌ្ឍន៍សមិទ្ធផលរីកចំរើនច្រើនគួរឲ្យកត់សម្គាល់ ហើយប្រជាពលរដ្ឋក៍មានជីវភាពធូធារ មានធនធានមនុស្ស ដូច្នេះដើម្បីជាការឆ្លើយតប អរគុណសន្តិភាព សូមពុកម៉ែ បងប្អូន កូនក្មួយ អញ្ជើញទៅចូលរួមបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ ឲ្យបានគ្រប់ៗគ្នា ដែលប្រព្រឹត្តនៅថ្ងៃទី២៣ ខែកក្កដា ឆ្នាំ២០២៣នេះ ហើយសូមបងប្អូនគាំទ្របោះឆ្នោតជូនគណបក្សប្រជាជនកម្ពុជាដើម្បីរក្សាសន្តិភាព ស្ថេរភាព ការអភិវឌ្ឍន៍ឲ្យមានភាពចំរើនបន្ថែមទៀត និងដើម្បីគាំទ្រសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី និងលោកបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្រ្តីបន្តវេន ដើម្បីដឹកនាំប្រទេសរក្សាសន្តិភាព ដូច្នេះយើងនាំគ្នាបោះឆ្នោតជូនគណបក្សប្រជាជនកម្ពុជាឲ្យបានគ្រប់ៗគ្នា មានតែគណបក្សប្រជាជនតែ១គត់ដែលដោះស្រាយជូនប្រជាជន ជូនជាតិ ការអភិវឌ្ឍន៍នឹងនាំឲ្យប្រទេសមានកេរ្តិ៍ឈ្មោះល្បីល្បាយនៅលើឆាកអន្តរជាតិទៀតផង៕
