ខេត្តកំពង់ចាម ៖ ឆ្លើយតបទៅនឹងការព្រួយបារម្ភ រួមទាំងការរិះគន់ដែលគ្មានមូលដ្ឋានច្បាស់លាស់ពីក្រុមប្រឆាំង ទាក់ទងសុវត្ថិភាពបងប្អូនខ្មែរនៅអ៊ីស្រាអែលនោះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់ច្បាស់ៗថា សូមកុំបារម្ភ យើងបានតាមដានយ៉ាងយកចិត្តទុកដាក់ អំពីស្ថានភាពរបស់បងប្អូនដែលកំពុងរស់នៅប្រទេសអ៊ីស្រាអែលជាប្រចាំ និយាយឲ្យចំគឺរាល់ម៉ោងយើងត្រូវតែមានពត៌មានអំពី សុខទុក្ខ និងសុវត្ថិភាពរបស់បងប្អូននៅអ៊ីស្រាអែល ហើយមិនបានធ្វែសប្រហែស ឬមិនគិតគូរដូចការលើកទ្បើងរបស់ក្រុមប្រឆាំងនោះទេ។
សម្តេចធិបតី ហ៊ុន ម៉ាណែត បានលើកទ្បើងថា កន្លងទៅនេះ មានអ្នកនយោបាយចាស់វស្សា ចេញមកអួតអាង និងថាដើររៃអង្គាសលុយដើម្បីទីញសំបុត្រដឹកបងប្អូនខ្មែរកំពុងរស់នៅអ៊ីស្រាអែលវិលត្រទ្បប់មកប្រទេសវិញ ហើយចោទថា រាជរដ្ឋាភិបាលខ្មែរមិនទទួលខុសត្រូវចំពោះអាយុជីវិតរបស់ប្រជាពលរដ្ឋខ្មែរស្របតាមរដ្ឋធម្មនុញ្ញ។ ប៉ុន្តែសម្តេចសូមសួរទៅវិញថា មកដល់ពេលនេះបានរៃអង្គាសលុយហើយឬនៅ? គឺគ្មានទេ មានតែជិះយន្តហោះទៅអាមេរិកដើម្បីរៃអង្គាសលុយដាក់ហោប៉ៅខ្លួនឯងតែប៉ុណ្ណោះ។
សម្តេចធិបតី បញ្ជាក់ថា ចំពោះអាយុជីវិតប្រជាពលរដ្ឋគឺជាគោលដៅធំបំផុតដែលយើងខិតខំធ្វើ និងយកចិត្តទុកដាក់ខ្លាំងណាស់ក្នុងរយៈពេល៤៤ឆ្នាំមកនេះ និយាយរួមគឺតាំងពីឆ្នាំ១៩៧៩ ក្រោយរំដោះពីរបបប៉ុល ពត មកម្លេះ ។ សម្តេចធិបតីក៏បានលើកជាសំណួរថា បើមិនបម្រើប្រជាជន តើទៅបម្រើអ្នកណា ហើយនេះជាការពិតដែលយើងត្រូវតែបន្តធ្វើ ហើយធ្វើជាប្រចាំ និងជារៀងរហូត។
ពាក់ពន្ធ័ស្ថានភាពបងប្អូននៅអ៊ីស្រាអែល សម្តេចធិបតី បានថ្លែងឲ្យដឹងថា ចាប់តាំងពីថ្ងៃផ្ទុះសង្គ្រាមដំបូងនៅអ៊ីស្រាអែលនាថ្ងៃ៧ ខែតុលា និងមកដល់ម៉ោងនេះ រាជរដ្ឋាភិបាលបានតាមដានជាប់ និងឲ្យមានការរាយការណ៍ជាប្រចាំអំពីស្ថានភាព សុវត្ថិភាពបងប្អូននៅទីនោះ ជាក់ស្តែងយើងបានឲ្យមានរបាយការណ៍ ឬពត៌មានយ៉ាងតិច៤ដងក្នុងមួយថ្ងៃដើម្បីបានដឹងពិសុខទុក្ខរបស់បងប្អូននៅអ៊ីស្រាអែល គឺម៉ោង៧ព្រឹក ម៉ោង១២ថ្ងៃត្រង់ ម៉ោង៧ល្ងាច និងម៉ោង១០យប់ ជារៀងរាល់ថ្ងៃ និងជាប្រចាំ។
សម្តេចបញ្ជាក់បន្ថែមថា ចាប់តាំងពីថ្ងៃផ្ទុះដំបូង យើងបានភ្ជាប់ទំនាក់ទំនងជាមួយបងប្អូនទាំងអស់ដើម្បីទទួលពត៌មានគ្រប់ជ្រុងជ្រោយ ថាតើបងប្អូនណាខ្លះនៅកន្លែងដែលមានសុវត្ថិភាព ហើយបងប្អូនណាខ្លះកំពុងស្ថិតនៅតំបន់អសុវត្ថិភាព ដើម្បីជួយបញ្ជូនពួកគាត់មកកាន់តំបន់មានសុវត្ថិភាព។សម្តេចធិបតី ក៏បានរិះគន់ថា ក្រុមប្រឆាំងដែលអួតអាងថា ជាអ្នកគិតគូរប្រជាពលរដ្ឋនោះ គ្រាន់តែចេញវីដេអូមួយឃ្លីបពីរឃ្លីបប៉ុណ្ណោះក៏ទៅបាត់ តើនោះជាវិធីនៃការគិតគូរពីផលប្រយោជន៍ប្រជាពលរដ្ឋពិតប្រាកដដែរឬទេ?
សម្តេចធិបតីក៏បន្ថែមដែរថា ក្នុងរយរយៈពេលតែ២/៣ ថ្ងៃ ដំបូងនៃការផ្ទុះ យើងបានទំនាក់ទំនងនិងដឹងពត៌មានអំពីសុខទុក្ខរបស់បងប្អូនប្រមាណ៤៥០ នាក់ ។ សម្តេចធិបតីបន្តថា យើងបានប្រទ្បាក់ក្រទ្បាគ្នា និងគ្រប់ស្ថាបន័ពាក់ពន្ធ័ទាំងអស់ដើម្បីដឹងអំពីពត៌មាននៃស្ថានភាព សុខទុក្ខរបស់បងប្អូនយើង ហើយមានកន្លែងខ្លះដែលប្រឈមនឹងកង្វះស្បៀងអាហារ យើងក៏ចាត់មន្ត្រីទូតដឹកជញ្ជូនទៅឲ្យពួកគាត់ថែមទៀត នេះបង្ហាញថា យើងគិតគូរខ្លាំងណាស់ចំពោះបងប្អូននៅប្រទេសអ៊ីស្រាអែល ហើយមិនដូចអ្វីដែលគេរិះគន់នោះទេ។
សម្តេចធិបតី ក៏បានឲ្យដឹងដែរថា មកដល់ពេលនេះ យើងបានរៀបចំកន្លែងដែលមានសុវត្ថិភាពជូនបងប្អូនទាំងអស់នៅអ៊ីស្រាអែល ដែលស្ថិតនៅឆ្ងាយពីកន្លែងប្រឈមជិត៣០០គីទ្បូម៉ែត្រ ដោយយកកន្លែងជាប់ព្រុំដែនប្រទេសអេហ្ស៊ីបជាទីតាំងសុវត្ថិភាពសម្រាប់បងប្អូនយើង។ ប៉ុន្តែបើមានហេតុការណ៍កើតទ្បើងនៅទូទាំងប្រទេសអ៊ីស្រាអែលនោះ យើងនឹងមានផែនការដើម្បីផ្តល់សុវត្ថិភាពជូនបងប្អូនខ្មែរយើងបន្ថែមទៀត ជាក់ស្តែងយើងបានសម្របសម្រួលឲ្យមានការបើកច្រកសម្រាប់ប្រជាពលរដ្ឋយើងចូលទៅកាន់ប្រទេសអេហ្ស៊ីប ។ ដូច្នេះមាននយ័ថា យើងបានគិតគូរគ្រប់ជំហ៊ានសម្រាប់សុវត្ថិភាពបងប្អូន ។ សម្តេចធិបតីបញជាក់បន្ថែមថា យើងបានជួលសណ្ឋាគារផ្កាយ៥មួយកន្លែងនៅជាប់ព្រុំដែនជាមួយអេហ្ស៊ីប ដើម្បីទុកសម្រាប់ទទួលបងប្អូនខ្មែរយើងស្នាក់នៅ នៅពេលដែលពួកគាត់ត្រូវជម្លៀស ហើយបងប្អូនខ្មែរយើងដែលកំពុងស្ថិតនៅកន្លែងគ្មានសុវត្ថិភាពហើយចង់ចាកចេញគឺអាចអញ្ជើញដោយស្មគ្រ័ចិត្តមកស្នាក់នៅក្នុងសណ្ឋាគារនោះ។ ដូច្នេះនេះហើយជាការគិតគូរ និងយកចិត្តទុកដាក់របស់រាជរដ្ឋាភិបាលចំពោះអាយុជីវិតរបស់ប្រជាពលរដ្ឋ។ ប៉ុន្តែអ្វីជាការលំបាកនោះ គឺលំបាកអ្នកដែលរស់នៅស្រុកបារាំង អ្នករស់នៅតំបន់អ៊ឺរ៉ុបចម្ងាយរាប់ពាន់គីទ្បូ ហើយដឹងអំពីស្ថានភាព សុវត្ថិភាពនៅអ៊ីស្រាអែល ជាងបងប្អូបខ្មែរយើងដែលកំពុងរស់នៅអ៊ីស្រាអែលទៅទៀត។
សម្តេចធិបតីថា នៅពេលរាជរដ្ឋាភិបាលរៀបចំកន្លែងសុវត្ថិភាពប្រមាណ៣០០គីទ្បូ ដើម្បីឲ្យបងប្អូនស្នាក់នៅ ហើយយើងធានាទាំងការស្នាក់នៅ ហូបចុក តែបងប្អូននិស្សិតខ្មែរជាង៤០០នាក់បានផ្តល់ពត៌មានមកយើងថា ពួកគាត់មិនចាំបាច់នឹងទៅស្នាក់នៅសណ្ឋាគារដែលរាជរដ្ឋាភិបាលត្រៀមបម្រុងសម្រាប់ជម្លៀសនោះទេ ដោយក្នុងនោះមានទាំងចម្លើយរបស់និស្សិតខ្មែរនៅជិតតំបន់ហ្គាហ្សាផងដែរ។ សម្តេចបន្តថា យើងមិនដើរក្រោយសភាពការណ៍ទេ យើងដើរមុនសភាពការណ៍ ប៉ុន្តែយើងក៏មិនលោតតាមសភាពការណ៍នោះដែរ ពិសេសយើងស្តាប់តាមបងប្អូននៅមូលដ្ឋាន។
ទោះជាយ៉ាងណាក៏ដោយ សម្តេចធិបតី ហ៊ុន ម៉ាណែត បានសម្តែងការសោកស្តាយចំពោះការបាត់បង់និស្សិតខ្មែរម្នាក់ ដោយការវាយប្រហារនៅតំបន់ហ្គាហ្សាប្រទេសអ៊ីស្រាអែល កាលពីថ្ងៃទី៧ ខែតុលា ហើយសពនិស្សិតត្រូវបានរៀបចំធ្វើបុណ្យតាមប្រពៃណី ខណដែលរាជរដ្ឋាភិបាលទទួលបន្ទុកទាំងអស់។
សូមជម្រាបថា ការថ្លែងខាងលើនេះ ធ្វើទ្បើងក្នុងឱកាសដែលសម្តេចធិបតី ហ៊ុន ម៉ាណែត អញ្ជើញជាអធិបតីក្នុងពិធីសំណេះសំណាល ជាមួយកម្មករ និយោជិត ជាងមួយម៉ឺននាក់ នៅស្រុកចំនួន២ ក្នុងខេត្តកំពង់ចាម នាព្រឹកថ្ងៃទី២៥ ខែតុលា ឆ្នាំ២០២៣ នេះ៕
