ខេត្តកោះកុង ៖ នៅព្រឹកថ្ងៃទី០៧ ខែធ្នូ ឆ្នាំ២០២៣ សម្ដេចពិជ័យសេនា ទៀ បាញ់ ឧត្ដមក្រុមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានអញ្ជើញជាអធិបតី ក្នុងមិទ្ទិញអបអរសាទរ ខួបអនុស្សាវរីយ៍ លើកទី៤៥ ទិវាកំណើតរណសិរ្សសាមគ្គីអភិវឌ្ឍន៍ មាតុភូមិកម្ពុជា ២ ធ្នូ ១៩៧៨ - ២ ធ្នូ ២០២៣ ស្ថិតនៅស្ដូបនយោបាយឈ្នះឈ្នះ ក្នុងក្រុងខេមរៈភូមិន្ទ ខេត្តកោះកុង ដោយមានការនិមន្ត និងអញ្ជើញចូលរួមពី ព្រះមេគណខេត្តទាំងពីរគណៈ អ្នកឧកញ៉ា លោកឧកញ៉ា ឯកឧត្ដម លោកជំទាវ មន្ត្រីរាជការ កងកម្លាំងប្រដាប់អាវុធទាំងបីប្រភេទ ប្រជាពលរដ្ឋ លោកគ្រូអ្នកគ្រូ សិស្សានុសិស្ស និងក្រុមយុវជន ប្រមាណជាង ១០០០ នាក់ផងដែរ ។
សម្ដេចពិជ័យសេនា ទៀ បាញ់ ឧត្ដមក្រុមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជាបានមានប្រសាសន៍ថា ៖ រណសិរ្សសាមគ្គីអភិវឌ្ឍន៍មាតុភូមិកម្ពុជា ដែលបានវាយតម្លៃយ៉ាងល្អិតល្អន់ អំពីអត្តន័យជាប្រវត្តិសាស្ត្រ នៃរណសិរ្សសាមគ្គីអភិវឌ្ឍន៍មាតុភូមិកម្ពុជា និងបណ្ដាសមិទ្ធផលនានា ចាប់តាំងពីក្រោយថ្ងៃបង្កើតរណសិរ្ស ០២ ធ្នូ ១៩៧៨ រហូតដល់បច្ចុប្បន្ន។
រណសិរ្សសាមគ្គីសង្គ្រោះជាតិកម្ពុជា ដែលបច្ចុប្បន្នមានឈ្មោះថា «រណសិរ្សសាមគ្គីអភិវឌ្ឍន៍មាតុភូមិកម្ពុជា» ដឹកនាំដោយសម្ដេចអគ្គមហាពញាចក្រី ហេង សំរិន, សម្ដេចអគ្គមហាធម្មពោធិសាល ជា ស៊ីម, សម្ដេចអគ្គមហាសេនាបតីតេជោ ហ៊ុន សែន និងថ្នាក់ដឹកនាំដទៃទៀត គឺជាបុព្វការីដ៏មានគុណបំផុតរបស់យើងទាំងអស់គ្នា ព្រោះថារណសិរ្យនេះហើយ ដែលនាំមកនូវមហាជ័យជំនះ ៧ មករា សង្គ្រោះជីវិតប្រជាជនកម្ពុជា ឲ្យរួចផុតពីសេចក្ដីស្លាប់ និងបានរស់នៅក្នុងកិត្តិយស សេចក្ដីថ្លៃថ្នូរ សុខសន្តិភាព ការអភិវឌ្ឍរីកចម្រើនលើគ្រប់វិស័យ និងសិទ្ធិសេរីភាពយ៉ាងទូលំទូលាយ គ្រប់ពេល និងគ្រប់ទីកន្លែង ។
យើងទាំងអស់គ្នាត្រូវចាត់ទុកអង្គការរណសិរ្សនេះ ជាអ្នកមានគុណ ជាវីរជនអ្នកស្នេហាជាតិយ៉ាងពិតប្រាកដ ព្រោះមានតែអគ្គស្ថាបនិក និងអង្គការរណសិរ្សនេះតែមួយគត់ ដែលបានក្រោកឈរ ពីក្នុងស្ថានភាពដ៏លំបាកលំបិន ប្រមូលផ្ដុំកម្លាំងសាមគ្គីគ្រប់ទិសទី ដឹកនាំការតស៊ូរំដោះជាតិ មាតុភូមិ និងប្រជាជនឲ្យបានរស់រានមានជីវិត រួចផុតពីគ្រោះមហន្តរាយ បនប្រល័យពូជសាសន៍ ជាស្នូលដឹកនាំក្នុងការកសាងមាតុភូមិពីគំនរផេះផង់ ឆ្ពោះមកកាន់ភាពសម្បូររុងរឿង សុខដុមរមនា នាពេលនេះ និងទៅថ្ងៃអនាគត។
ថ្ងៃ ០២ធ្នូ គឺជាទិវាប្រវត្តិសាស្ត្ររបស់ជាតិយើង យើងយល់ច្បាស់ថា បើគ្មានថ្ងៃ០២ ធ្នូ និងថ្ងៃជ័យជំនះ ៧ មករា ទេ យើងគ្មានអ្វីៗទាំងអស់ ដូចសព្វថ្ងៃនេះដែរ ។ នេះជាសច្ចធម៌ប្រវត្តិសាស្ត្រ ដែលមិនអាចបុគ្គលណាបដិសេធបានឡើយ។ ខួបអនុស្សាវរីយ៍លើកទី៤៥ ទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា ឆ្នាំ២០២៣នេះ ប្រារព្ធធ្វើឡើងក្នុងសភាពការណ៍ ដែលព្រះរាជាណាចក្រកម្ពុជា និយាយរួមនិងនិយាយ ដោយ ឡែក ខេត្តកោះកុងសម្រេចបានសមិទ្ធផលធំៗជាច្រើន ក្រោមការបន្តដឹកនាំ របស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ប្រទេសជាតិឈានទៅមុខ ប្រកបដោយភាពជឿជាក់ខ្ពស់ លើមាគ៌ាសន្តិភាព ប្រជាធិបតេយ្យ និងអភិវឌ្ឍន៍ ជាមួយការលេចត្រដែតឡើង នូវកិត្យានុភាពរបស់កម្ពុជាលើឆាកអន្តរជាតិ៕
