ខេត្តកំពង់ធំ ៖ ឯកឧត្តម សួន រ៉ាស៊ី អគ្គលេខាធិការរងនៃគណៈកម្មាធិការជាតិជំរុញចលនាភូមិមួយផលិតផលមួយ លោក ងន សារណៈ ប្រធាននាយកដ្ឋាន កញ្ញា ឃឹម ស្រីពៅ ជំនួយការភូមិមួយផលិតផលមួយ អមដំណើរដោយឯកឧត្តម ជា វ៉ាន់ចាន់ អភិបាលរងខេត្តកំពង់ធំ មន្ទីរអង្គភាព និងអាជីវករជាច្រើនបានអញ្ជើញចូលរួមក្នុងពិធីកាត់ខ្សែបូរការដាក់តាំងពិព័ណ៍ផលិតផលក្នុងស្រុកភូមិមួយផលិតផលមួយ នៅក្រុងស្ទឹងសែន ខេត្តកំពង់ធំ ដែលជាព្រឹត្តិការណ៍ធំបំផុត ចាប់ពីថ្ងៃទី១៧ រហូតដល់ថ្ងៃទី២៤ ខែមករា ឆ្នាំ២០២៤ ស្ថិតនៅសួនមាត់ស្ទឹងសែន ខេត្តកំពង់ធំ រសៀលថ្ងៃទី១៧ ខែមករា ឆ្នាំ២០២៤។
ថ្លែងនៅក្នុងកម្មវិធីនេះឯកឧត្តម ជា វ៉ាន់ចាន់ អភិបាលរងខេត្តកំពង់ធំ បានមានប្រសាសន៍ថាគោលនយោបាយជាតិសម្រាប់ជំរុញចលនាភូមិមួយផលិតផលមួយ បានយកចិត្តទុកដាក់យ៉ាងខ្លាំងលើអ្នកផលិតខ្នាតតូច និងមធ្យមដែលជាគោលដៅអាទិភាពដំបូង។ អ្នកផលិតខ្នាតតូចផ្នែកកែច្នៃ ស្បៀងអាហារ និងភេសជ្ជៈ មានការយកចិត្តទុកដាក់លើបញ្ហាអនាម័យ ដូចជាការស្តុកទុកវត្ថុធាតុដើម និងផលិតផលសម្រេចមិនបានត្រឹមត្រូវ និងការវេចខ្ចប់មិនស្របតាមស្តង់ដារអនាម័យឧបករណ៍កែច្នៃតិចតួចការគ្រប់គ្រងកាកសំណល់មិនអាចទទួលយកបាន។
ឯកឧត្តម សួន រ៉ាស៊ី បានមានប្រសាសន៍ថា ក្រោមគម្រោងលើកកំពស់ការអនុវត្តអនាម័យរបស់អ្នកផលិតអាហារ បានរៀបចំគោលការណ៍ ណែនាំស្តីពីសុវត្ថភាពនិងអនាម័យចំណីអាហារ ក្នុងគោលបំណងគឺដើម្បីផ្តល់ជូននូវចំណេះដឹងដល់ ប្រតិបត្តិករគ្រប់ទីកន្លែង ផលិតចំណីអាហារដែលបានទទួល ឬមិនទាន់បានទទួលអាជ្ញាប័ណ្ណ ត្រូវតែមាន ផែនការអនុវត្តនូវគោលការណ៍ណែនាំស្តីពីសុវត្ថិភាពនិងអនាម័យចំណីអាហារ ព្រមទាំងផ្តល់ការណែនាំ ដល់ប្រតិបត្តិករ សេវាករចំណីអាហារ ពាក់ព័ន្ធនឹងធាតុចាំបាច់នៃការការពារចំពោះសុវត្ថិភាព និងអនាម័យ ចំណីអាហារសម្រាប់កន្លែង ផលិតឱ្យបានជាអតិប្បរមា។
ឯកឧត្តម សួន រ៉ាស៊ី អគ្គលេខាធិការរងនៃគណៈកម្មាធិការជាតិជំរុញចលនាភូមិមួយផលិតផលមួយ បានលើកទឹកចិត្តដល់អ្នកផលិត ឬផលិតករ សេវាករម្ហូបអាហារទាំងឡាយទទួលបានចំណេះដឹងកាន់តែប្រសើរឡើង អំពីការអនាម័យ និងសុវត្ថិភាពចំណីអាហារអ្នកផលិត ឬប្រតិបត្តិករ សេវាករម្ហូបអាហារទាំងឡាយប្រកាន់ខ្ជាប់ការអនុវត្តអនាម័យ និងសុវត្ថិភាពចំជាអាហារ និងដើម្បីចៀសផុតពីការដាក់ទោសទណ្ឌទៅតាមច្បាប់។
សូមបញ្ជាក់ផងដែរថា ក្រោយពីគណៈអធិបតីកាត់ខ្សែបូររួចមក បានអញ្ជើញចុះពិនិត្យផលិតផលដែលកូនខ្មែរបានផលិតហើយ យកដាក់តាំងនៅតាមស្តង់នីមួយៗទៅតាមប្រភេទនៃផលិតផល ព្រមទាំងណែនាំដល់អាជីវករទាំងអស់ត្រូវយកចិត្តទុកដាក់ពីអនាម័យ និងការវេចខ្ចប់ឱ្យបានត្រឹមត្រូវ៕
