ខេត្តស្ទឹងត្រែង ៖ នាពេលថ្មីៗនេះ មន្ត្រីនៃមន្ទីរបរិស្ថានខេត្តស្ទឹងត្រែង បានប្រទះឃើញវល្លិរមៀតប្រមាណ ៤តោន ដែលគេយកទៅទុកក្នុងបរិវេណនៃឧទ្យានជាតិវ៉ើនសៃ-សៀមប៉ាង ហើយរហូតមកដល់ពេលនេះ នៅមិនទាន់រកម្ចាស់ឃើញនៅទ្បើយ។ យ៉ាងណាក៏ដោយមន្ត្រីបាននិងកំពុងតែបន្តស្រាវជ្រាវរកម្ចាស់វល្លិរមៀតខុសច្បាប់នេះ ដែលឈ្មួញបម្រុងនាំចេញទៅប្រទេសទ្បាវ។
គួររម្លឹកថា កាលពីថ្ងៃទី២១ ខែកុម្ភៈ ឆ្នាំ២០២៤ មន្ត្រីឧទ្យានុរក្សបរិស្ថានខេត្តស្ទឹងត្រែង បានចុះល្បាតដើម្បីទប់ស្កាត់បង្ក្រាបបទល្មើសធនធានធម្មជាតិគ្រប់ប្រភេទ ក្នុងឧទ្យានជាតិវ៉ើនសៃ-សៀមប៉ាង ហើយក៏បានប្រទះឃើញគំនរវល្លិរមៀតចំនួន៦៥ការុង ស្ថិតក្នុងភូមិសាម៉ឃុំសេកុង ស្រុកសៀមប៉ាង។
យោងតាមក្រសួងបរិស្ថានបានបញ្ជាក់ថា នៅថ្ងៃ២២ ខែកុម្ភៈ ឆ្នាំ២០២៤ មន្ត្រីអនុវត្តន៍ច្បាប់បានប្រមូលយកវល្លិរមៀត ចំនួន៦៥ការុងស្មើនឹង ៤០០០ គីឡូក្រាម ដែលជនមិនស្គាល់អត្តសញ្ញាណបានលាក់ទុកក្នុងព្រៃបម្រុងដឹកជញ្ជូនយកទៅលក់បន្តទៅប្រទេសឡាវ។ ក្រុមការងារបានប្រមូលយកមករក្សាទុកនៅស្នាក់ការឧទ្យានជាតិវីរជ័យ-ស្រុកសៀមប៉ាង (វល្លិរមៀត) ទាំងអស់នោះ មានប្រភពចេញពីឧទ្យានជាតិវ៉ើនសៃ-សៀមប៉ាង។
ក្រសួងបរិស្ថានបានឱ្យដឹងថា ការកែច្នៃវល្លិរមៀតគឺជាសកម្មភាពផ្ទុយនឹងច្បាប់ស្តីពីតំបន់ការពារធម្មជាតិ ត្រង់មាត្រា៦១ ដែលត្រូវផ្តន្ទាទោសជាបទល្មើស ធនធានធម្មជាតិថ្នាក់ទី៣ និងច្បាប់ស្តីពីព្រៃឈើត្រង់មាត្រា៩៧ ដែលត្រូវផ្តន្ទាទោសជាបទល្មើសព្រៃឈើ ថ្នាក់ទី១ផងដែរ។
ពាក់ពន្ធ័ករណីនេះ ប្រធានមន្ទីរបរិស្ថានខេត្តស្ទឹងត្រែងលោក ស្រេង ជាហេង បានថ្លែងប្រាប់សារពត៌មានក្នុងស្រុកថា មន្ទីរបរិស្ថានបានសហការជាមួយអាជ្ញាធរមូលដ្ឋានដើម្បីស្រាវជ្រាវរកជនសង្ស័យពាក់ព័ន្ធនឹងវល្លិរមៀតនេះ។លោកថា មន្ទីរក៏បានកសាងសំណុំរឿងនេះ និងករណីបទល្មើសធនធានធម្មជាតិផ្សេងៗទៀតបញ្ជូនទៅតុលាការខេត្ត ដើម្បីអនុវត្តនីតិវិធីច្បាប់នាថ្ងៃទី២៧ ខែកុម្ភៈឆ្នាំ២០២៤ផងដែរ។
លោកបន្តថា រហូតមកដល់ថ្ងៃទី២៨ ខែកុម្ភៈការស្រាវជ្រាវនៅមិនទាន់ទទួលបានតម្រុយណាមួយទាក់ទងនឹងអ្នកទទួលខុសត្រូវលើវល្លិរមៀតនោះនៅឡើយទេ។ ប៉ុន្តែបច្ចុប្បន្ននេះក៏មានប្រជាពលរដ្ឋក្នុងមូលដ្ឋានមួយចំនួនបានរកវល្លិរមៀតលក់ ដែលក្នុង១គីឡូក្រាមតម្លៃប្រមាណជាពី៤០០ ទៅ៥០០រៀលប៉ុណ្ណោះ។
គួររម្លឹកដែរថា នគរបាលប្រឆាំងបទល្មើសសេដ្ឋកិច្ចខេត្តក៏បានធ្វើការបង្ក្រាបករណីដឹកជញ្ជូនវល្លិរមៀតខុសច្បាប់ចំនួន ៨០ការុង ប្រហែលស្មើនឹង ៤ តោនផងដែរនៅក្នុងស្រុកបុរីអូរស្វាយសែនជ័យ កាលពីថ្ងៃទី១២ ខែកុម្ភៈ ឆ្នាំ២០២៤ ក្នុងនោះក៏បានធ្វើការឃាត់ខ្លួនជនសង្ស័យជាបុរសចំនួន ២ នាក់ និងរថយន្តចំនួន២គ្រឿង៕
