ខេត្តកំពង់ធំ ៖ ឯកឧត្តម នួន ផារ័ត្ន អភិបាលខេត្តកំពង់ធំ និងក្រុមការងារ បានចុះសួរសុខទុក្ខ និងចែកជូនពូជស្រូវជិត ២០០ តោន ដែលជាជំនួយពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ពេជ្រ ចន្ទមុន្នី ហ៊ុន ម៉ាណែត ដល់ប្រជាកសិករចំនួន ១,៤៨៨ គ្រួសារ ក្នុងស្រុក ៤ រួមមាន ស្រុកបារាយណ៍ សន្ទុក សណ្តាន់ និងប្រាសាទសំបូរ។ ការផ្ដល់ជំនួយនេះមានគោលបំណងជួយស្តារលទ្ធភាពការដាំដុះឡើងវិញ បន្ទាប់ពីរដូវទឹកជំនន់ នៅថ្ងៃទី ២១ ខែតុលា ឆ្នាំ ២០២៤។
ឯកឧត្តម នួន ផារ័ត្ន បានបញ្ជាក់ថា ការចែកពូជស្រូវនេះត្រូវបានចាត់ចែងតាមការណែនាំពីសម្ដេច ហ៊ុន ម៉ាណែត ដែលជានិច្ចយកចិត្តទុកដាក់ដល់សុខទុក្ខរបស់ប្រជាពលរដ្ឋជាពិសេសអ្នករងគ្រោះដោយទឹកជំនន់។ អភិបាលខេត្តកំពង់ធំ បានលើកឡើងថា ទឹកជំនន់ក្នុងខេត្តបានប៉ះពាល់ដល់ ៨ ក្រុង/ស្រុក ប៉ុន្តែការចែកជូនពូជស្រូវនេះបានផ្ដោតចំនួន ៤ ស្រុកជាបឋម ហើយស្រុកដែលនៅសល់នឹងបន្តចែកជូននៅពេលបន្ទាប់។
ឯកឧត្តម នួន ផារ័ត្ន បានអាចារថា ទឹកជំនន់នេះមិនត្រឹមតែប៉ះពាល់ដល់ដំណាំនៃតំបន់នោះទេ ប៉ុន្តែមានការខូចខាតដល់ហេដ្ឋារចនាសម្ព័ន្ធផ្សេងៗដូចជាស្ពាន ផ្លូវ ជនបទ សាលារៀន មណ្ឌលសុខភាព និងវត្តអារាមមួយចំនួន។ ដោយឡែក អាជ្ញាធរខេត្តកំពង់ធំបានត្រៀមខ្លួនជាប្រចាំ ដើម្បីគ្រប់គ្រងស្ថានភាព និងធ្វើការផ្សព្វផ្សាយដល់ប្រជាពលរដ្ឋ ដើម្បីពង្រឹងការប្រុងប្រយ័ត្ន និងចាត់វិធានការបម្រុងទុក។
ការផ្ដល់ពូជស្រូវនេះបង្ហាញពីការយកចិត្តទុកដាក់និងការងាររបស់រាជរដ្ឋាភិបាលកម្ពុជាក្រោមការដឹកនាំរបស់សម្ដេច ហ៊ុន ម៉ាណែត ដើម្បីជួយស្តារស្ថានភាពដាំដុះនៃដំណាំស្រូវដែលបានរងផលប៉ះពាល់ដោយទឹកជំនន់។
