ខេត្តកំពង់ឆ្នាំង ៖ មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅលើផ្លូវជាតិលេខ ៥ ចន្លោះគីឡូម៉ែត្រលេខ ១១៥/១១៦ ស្ថិតក្នុងភូមិអង្គ ឃុំពពេល ស្រុកបរិបូណ៍ ខេត្តកំពង់ឆ្នាំង។ ឧប្បត្តិហេតុនេះបានកើតឡើងកាលពីម៉ោង ១៤:១០ នាទី ថ្ងៃទី ៨ ខែធ្នូ ឆ្នាំ២០២៤។
តាមការរាយការណ៍ ករណីនេះបានកើតឡើងនៅពេលដែលរថយន្តម៉ាកហ៊ីយ៉ាន់ដាយ ពណ៌ស ផលិតឆ្នាំ ២០០១ ពាក់ស្លាកលេខ ពោធិ៍សាត់ ៣A១១៥៧ បើកបរដោយ លោក សេង សុផាន់ណា អាយុ ៣៩ ឆ្នាំ រស់នៅភូមិបេង ឃុំអន្លង់វិល ស្រុកសង្កែ ខេត្តបាត់ដំបង បានបង្កឲ្យរថយន្តសំយ៉ាបតូបលក់ដូរមួយកន្លែង ដែលជាកន្លែងធ្វើអាជីវកម្មរបស់លោក ហែម ស៊ីណេង អាយុ ៤១ ឆ្នាំ រស់នៅទីតាំងកើតហេតុ។
សាក្សីនៅទីតាំងបានឲ្យដឹងថា មុនកើតហេតុ លោក ហែម ស៊ីណេង កំពុងអង្គុយលក់ដូរដូចសព្វមួយដង ស្រាប់តែរថយន្តបានបើកពីទិសខាងជើងទៅទិសខាងត្បូង មិនអាចគ្រប់គ្រងបានបណ្តាលឲ្យបុកសំយ៉ាបតូបនោះតែម្តង។
ប្រភពសមត្ថកិច្ចបានបញ្ជាក់ថា មូលហេតុបណ្តាលមកពីអ្នកបើកបរ មិនបានពិនិត្យស្ថានភាពបច្ចេកទេសរថយន្តមុនចេញដំណើរ។ ដោយសាររថយន្តរលត់ម៉ាស៊ីន ហ្វ្រាំងមិនស៊ី និងចង្កូតមិនដំណើរការ ត្រូវបង្កឲ្យមានគ្រោះថ្នាក់ដ៏អាក្រក់នេះ។
ហេតុការណ៍នេះបានបណ្តាលឲ្យលោក ហែម ស៊ីណេង រងរបួសធ្ងន់។ ចំណែកអ្នករួមដំណើររថយន្ត ១ នាក់ ឈ្មោះ អ្នកញ៉ុង អ៊ិត អាយុ ៥៣ ឆ្នាំ រងរបួសស្រាល និងត្រូវបានបញ្ជូនទៅមន្ទីរពេទ្យសម្រាប់ការព្យាបាលបន្ថែម។
ខូចខាតសម្ភារៈមានដូចជា:
សំយ៉ាបតូបលក់ដូរប្រវែង ៤ ម៉ែត្រ
ពាងទឹក ១
ដើមដូង ១
លូអណ្ដូងខ្នោះ ១
រថយន្តបង្ក ១ គ្រឿង (ខូចខាតធ្ងន់)
បច្ចុប្បន្ន សមត្ថកិច្ចកំពុងរក្សាទុករថយន្តនោះនៅទីតាំងដើម្បីបន្តដោះស្រាយតាមនិតិវិធី៕
